9 oktyabrda Bakı Ekspo Mərkəzində keçirilən VIII Bakı Beynəlxalq Kitab Sərgisinin Xurşidbanu Natəvan təqdimat zonasında şair Aqşin Yeniseylə “Şeir axşamı” adlı tədbir keçirilib.

Tehsil.biz xəbər verir ki, tədbir çərçivəsində Aqşin Yenisey Azərbaycan Respublikası Mədəniyyət Naziriliyi tərəfindən təsis olunan “Şuşa-270” döş nişanı ilə təltif olunub.

Mədəniyyət Nazirliyinin Kitab sənayesi şöbəsinin müdiri Akif Marifli döş nişanını Aqşin Yeniseyə təqdim edib.

Təltif mərasimindən sonra Aqşin Yenisey təəssüratlarını bölüşüb. Bakı Beynəlxalq Kitab Sərgisində beşinci dəfə iştirak etdiyini, ilk dəfə belə bir təltiflə mükafatlandırıldığını bildirən Aqşin Yenisey qeyd edib ki, “bu mənim üçün çox gözlənilməz oldu. Şuşa şəhərinin adını daşıyan hər bir şey mənim üçün dəyərli və qiymətlidir. Çox qürurla mən bu döş nişanını öz üzərimdə daşıyacam. Artıq Şuşa mənim ürəyimin başında olacaq. Mən bu dəyərə görə ilk növbədə Azərbaycan Respublikasının Mədəniyyət Nazirliyinə öz dərin təşəkkürümü bildirirəm”.

Qeyd edək ki, Aqşin Yenisey VIII Bakı Beynəlxalq Kitab Sərgisinin fəxri yazarıdır.