Gəncə Dövlət Universitetində (GDU) böyük Azərbaycan şairi Əhməd Cavadın həyat və yaradıcılığına həsr edilən “Əhməd Cavad və Türk dünyası” adlı tədbir keçirilib.

Universitetdən verilən məlumata görə, tədbirdə əvvəlcə Dövlət Himni səsləndirilib, Vətən müharibəsi şəhidlərinin əziz xatirəsi yad edilib.

Çıxış edən universitetin humanitar məsələlər üzrə prorektoru, dosent Gülsüm Fətəliyeva qeyd edib ki, tədbir böyük Azərbaycan şairi Əhməd Cavadın anadan olmasının 130 illiyinin keçirilməsinə dair Azərbaycan Prezidenti İlham Əliyevin Sərəncamına əsasən təşkil edilib.

Ədəbi-bədii tədbirdə Azərbaycan Türk Ocağı İctimai Birliyinin sədri Akif Aşırlı, professor Bədirxan Əhmədov, Gəncə Dövlət Universitetinin dosenti Bayram Apoyev, universitetin dosenti Səba Namazova və AMEA-nın Gəncə bölməsinin əməkdaşı, filologiya üzrə fəlsəfə doktoru Əlimuxtar Muxtarov çıxış edərək diqqətə çatdırıblar ki, Əhməd Cavad Türk dünyasının istiqlal şairi kimi böyük şöhrət qazanıb. Onun “Çırpınırdın Qara dəniz” şeiri tük dünyasının azadlıq himnin əks-sədasıdır.

O da vurğulanıb ki, Əhməd Cavadın Azərbaycanın müstəqilliyi, dövlət quruculuğu sahəsindəki fəaliyyəti bütün nəsillər üçün hər zaman örnək olub. Əhməd Cavadın həyat və yaradıcılığının ən parlaq dövrü Azərbaycan Xalq Cümhuriyyətinin yaranması illərinə təsadüf etmiş və şair 1930-cu illərin ağır repressiya qurbanına çevrilmişdir.

Sonda tələbələr tərəfindən şeirlər səsləndirilib.