Bu gün Mingəçevir Dövlət Universitetində (MDU) “8 Noyabr- Zəfər Günü”nə həsr olunan “Azərbaycan tarixinə qızıl hərflərlə həkk olunmuş ümumxalq Zəfəri” mövzusunda elmi-nəzəri konfrans keçirilib.
Tehsil.biz xəbər verir ki, konfransda şəhid ailələrinin üzvləri, qazilər, MDU-nun akademik və inzibati heyəti, İctimai Nəzarət Şurasının üzvləri, KİV nümayəndələri, tələbə və magistrantlar iştirak edib.
Dövlət Himninin səsləndirilməsi ilə başlanan konfransda ölkəmizin ərazi bütövlüyü uğrunda canından keçən qəhrəman şəhidlərin əziz xatirəsi bir dəqiqəlik sükutla yad edilib.
Konfransın açılışında çıxış edən MDU-nun rektoru Şahin Bayramov 44 günlük Vətən müharibəsində qazanılan tarixi Zəfərin ikinci ildönümü münasibətilə iştirakçılara təbriklərini çatdırıb. Müzəffər Ali Baş Komandan İlham Əliyevin qətiyyətli rəhbərliyi ilə rəşadətli Azərbaycan Silahlı Qüvvələrinin doğma torpaqlarımızı erməni işğalından azad etdiyini və 30 illik yurd həsrətinə son qoyduğunu bildirən Ş.Bayramov Qarabağ Zəfərini müstəqillik tariximizin ən şanlı səhifələrindən biri olduğunu vurğulayıb. Qeyd edilib ki, şanlı qalibiyyətin qazanılması ilə ümummilli lider Heydər Əliyevin vəsiyyəti yerinə yetirildi. Ulu Öndərin xalqımıza miras qoyduğu müstəqil Azərbaycanın ərazi bütövlüyü təmin olundu və tarixi ədalət bərpa edildi.
Rektor bildirib ki, uzun müddət işğal altında qalmış əzəli torpaqlarımızda hazırda Azərbaycanın üçrəngli bayrağının dalğalanması, erməni vandalizminə məruz qalan ərazilərdə sürətli quruculuq və abadlıq işlərinin həyata keçirilməsi və buranın əsl sahiblərinin doğma yurdlarına qayıtmağa başlaması hər birimizdə böyük qürur hissləri yaradır. Bütün bunlara görə, hər şeydən əvvəl, Vətən uğrunda canından və qanından keçən şəhidlərimizə borclu olduğumuzu bildirən Ş.Bayramov Azərbaycanın xoşbəxt və firavan gələcəyi naminə şəhidlik zirvəsinə ucalan qəhrəman övladların əziz xatirəsinin heç vaxt unudulmayacağını və daim böyük ehtiramla yad ediləcəyini deyib.
Şanlı Qələbənin rəmzinə çevrilən “Dəmir yumruq” ilə Vətən tarixinin qəhrəmanlıq salnaməsinin yazıldığını qeyd edən rektor döyüş meydanlarında misilsiz şücaət göstərən cəsur əsgər və zabitlərin yüksək vətənpərvərlik, mübarizlik, əzmkarlıq və fədakarlıq nümunələrini ortaya qoyduqlarını söyləyib. Tələbələrin vətənpərvərlik ruhunda tərbiyəsində belə örnəklərin təbliğinin önəmindən danışan Ş.Bayramov Qarabağ və tarixi Zəfərlə bağlı həqiqətlərin, igid oğulların göstərdikləri şücaətlərin gənc nəslə çatdırılması baxımından konfransın mühüm əhəmiyyət kəsb etdiyini diqqətə çatdırıb.
Zəfər Gününə həsr olunmuş videoçarxın nümayişindən sonra şəhid Yasən Əhmədovun həyat yoldaşı Aygün Əhmədova, şəhid Əzəmi Hüseyonovun bacısı Elnarə Hüseynova çıxış ediblər. Onlar şəhidlik zirvəsinə ucalan yaxınlarının şərəfli ömür yolundan bəhs ediblər və qürur duyduqlarını bildiriblər. Dövlətin yüksək diqqət və qayğısını daim hiss etdiklərini qeyd edən şəhid ailəsi üzvləri ölkə başçısına təşəkkürlərini çatdırıblar və şəhid məzunların universitetdə adlarının uca tutulmasından məmnunluqlarını ifadə ediblər.
Daha sonra, MDU-nun Humanitar fənlər kafedrasının müəllimi Şəlalə Quliyevanın moderatorluğu ilə konfrans məruzələrlə davam edib. MDU-nun Təhsil fakültəsinin dekanı Nizami Zeynalov “Müstəqillikdən başlanan Zəfər yolu”, Mexanika kafedrasının müdiri və Vətən Müharibəsi iştirakçısı Mahir İsmayılov “44 günlük Vətən Müharibəsi şanlı tariximizdir” və Humanitar fənlər kafedrasının əməkdaşı, əməkdar müəllim Könül Aydın “Ədəbiyyatda şanlı Zəfər yolu” mövzusunda çıxış ediblər.
Məruzələr konfrans iştirakçıları tərəfindən maraqla qarşılanıb.
Qeyd edək ki, Vətən müharibəsində qazanılan tarixi Zəfərin ikinci ildönümü münasibətilə MDU-da müxtəlif formatlı silsilə tədbirlərin keçirilməsi nəzərdə tutulub.
