Bu gün Azərbaycanın görkəmli bəstəkarı, Azərbaycan Respublikasının Xalq artisti Tofiq Quliyevin (1917-2000) doğum günüdür.

Tehsil.biz xəbər verir ki, Tofiq Quliyev Azərbaycan musiqi mədəniyyətində estrada-caz musiqisinin təməlini qoyaraq, yeni səhifə açmış korifey sənətkarlarımızdandır. 

Tofiq Quliyev Azərbaycan musiqi tarixinə mahnı, operetta və kinofilmlərə bəstələnən musiqinin müəllifi kimi daxil olub. Eyni zamanda, Tofiq Quliyev Variasiyalar, Fantaziya, "Cəmilənin albomu" fortepiano əsərlərinin və digər janrlarda əsərlərin də müəllifidir. 

Bu gün, 7 noyabr 2022-ci il tarixində bəstəkarın doğum günündə Azərbaycan Respublikası Mədəniyyət Nazirliyinin, Azərbaycan Bəstəkarlar İttifaqının (ABİ), Tofiq Quliyev adına 12 saylı Musiqi Məktəbinin, Azərbaycan Dövlət Akademik Filarmoniyasının kollektivlərinin, eləcə də Tofiq Quliyevin ailə üzvlərinin iştirakı ilə hörmətli sənətkarın məzarı ziyarət olunub. ABİ-nın sədri, bəstəkar, Xalq artisti Firəngiz Əlizadə, 12 saylı Musiqi Məktəbinin direktoru Gülnarə Səfərova, Xalq artisti, Azərbaycan Dövlət Xalq Çalğı Alətləri Orkestrinin bədii rəhbəri və baş dirijoru Ağaverdi Paşayev bəstəkarın yaradıcılığının musiqi tariximizdə daşıdığı əhəmiyyət, onun Azərbaycan musiqisinin inkişafındakı xidmətləri haqqında söhbət açıb. 

Xatirə tədbirinin sonunda bəstəkarın qızı Lalə Quliyeva atası ilə bağlı xatirələrini bölüşüb və tədbirin bütün iştirakçılarına dərin minnətdarlığını bildirib.