Logo

Özbəkistan kinosu günlərinin açılış mərasimi keçirilib - FOTO

09.12.2022 01:04 104 baxış
IMG

Dekabrın 7-də Nizami Kino Mərkəzində Özbəkistan kinosu günlərinin açılış mərasimi keçirilib.

Tehsil.biz xəbər verir ki, kino günləri Azərbaycan Mədəniyyət Nazirliyinin dəstəyi və Özbəkistanın ölkəmizdəki səfirliyinin təşkilatçılığı ilə gerçəkləşir.

Açılış mərasimində kinoşünas, Əməkdar incəsənət xadimi Ayaz Salayev çıxış edərək qonaqları salamlayıb, özbək kinosuna marağının hələ uşaq vaxtlarından başlandığını deyib: “Uşaq idim, atam mənə böyük alim və hökmdar Uluqbəy haqqında danışırdı. O vaxtlar məni daha çox Avropa filmləri maraqlandırsa da, atamın danışdıqları ürəyimdə Şərqə, xüsusilə də Özbəkistana qeyri-adi maraq oyatdı. Biz sovet dönəmində bir bayraq altında yaşadıq. Amma sonradan SSRİ dağılsa da, özbək və Azərbaycan xalqları bir-birindən ayrılmadı, əlaqələrimiz davam etdi. Bu gün Türk dünyası xalqlarının bir araya gəldiyi vaxtda mədəniyyətlərimizi bölüşmək, birgə layihələrlə çıxış etmək çox vacibdir”.

Azərbaycan Dövlət Film Fondunun direktoru, Əməkdar incəsənət xadimi Cəmil Quliyev ölkəmizdə Özbəkistan kinosu günlərinin təşkil olunmasının əhəmiyyətindən söz açıb. Bildirib ki, özbək kinematoqrafiyasının Şərq kinosunda, ümumiyyətlə, postsovet məkanında özünəməxsus yeri var. Sovet dövründə “SSRİ-nin Xalq artisti” fəxri adına ən çox məhz özbək aktyorlar layiq görülüb: “Onlardan ən məşhuru Kamil Yarmatovun yaradıcılığını xüsusi qeyd etmək olar. Nəbi Qəniyevin “Tahir və Zöhrə” filmi özbək kinosuna hər zaman işıq salmaqdadır. “Yeddinci güllə”, “Fövqəladə komissar” filmlərini, Əli Xamrayevin yaratdığı ekran əsərlərini, Şöhrət Abbasovun yaradıcılığını, xüsusən də “Sən yetim deyilsən” filmini maraqla izləmişəm. Bir sözlə, özbək filmləri unikaldır, diqqətəlayiqdir. Onilliklər ərzində Azərbaycan kinematoqrafçıları özbək həmkarları ilə birlikdə çalışıblar. Azərbaycan filmlərində özbək aktyorlar çəkilib. “Azərbaycanfilm”də lentə alınan “Görüş”, “Qızıl qaz” və s. filmlərdə özbək aktyorlar rola alıb. Bütün bunlar kino tariximizin qızıl səhifələrində qalır və inanırıq ki, gələcəkdə də iki qardaş xalqın kinematoqrafçıları birgə film istehsalında yaxından əməkdaşlıq edəcəklər”.   Cəmil Quliyev bu gün Azərbaycan Dövlət Film Fondunda 50 özbək filminin kinolentdə və 3 mindən artıq özbək kinosuna dair fotonun qorunub saxlanıldığını da diqqətə çatdırıb.

Mədəniyyət Nazirliyi Audiovizual və interaktiv media şöbəsinin müdiri Rüfət Həsənov bu ilin sentyabrında keçirilən Daşkənd Beynəlxalq Film Festivalı çərçivəsində Özbəkistan paytaxtında və Buxara şəhərində Azərbaycan kinosu günlərinin təşkil olunduğunu deyib. Bildirib ki, Azərbaycan kinematoqrafçıları bu tədbirlərdə böyük şövqlə iştirak ediblər. Filmlərimiz böyük maraqla qarşılanıb.

Özbəkistan Respublikası Kino Agentliyinin baş direktoru Firdavs Abdulxaliqov çıxışı zamanı iki ölkə arasında mədəni əməkdaşlığın gücləndirilməsi naminə bu cür tədbirlərin keçirilməsinin önəmli olduğunu bildirib. Deyib ki, gündən-günə inkişaf edən, müasirləşən Azərbaycanda Özbəkistan kinosu günlərinin keçirilməsi əlamətdar hadisədir. Direktor Özbəkistan və Azərbaycanın birgə iştirakı ilə məşhur lətifə qəhrəmanı Molla (Xoca) Nəsrəddin haqqında birgə filmin çəkilişinin reallaşacağını da diqqətə çatdırıb.

Özbək nümayəndə heyətinə göstərilən qonaqpərvərliyə görə təşəkkür edən F. Abdulxaliqov özbək filmlərinin azərbaycanlı kinosevərlər tərəfindən maraqla qarşılanacağına ümid etdiyini vurğulayıb.

Azərbaycanlı rejissor Eldar Məmmədov 40 ildir Özbəkistanda yaşadığını bildirib. Qeyd edib ki, Özbəkistanda Azərbaycana böyük sevgi və hörmət var: “Bu bizim mədəniyyət və incəsənətimizdə də açıq görünür. Bu müstəvidə kino günlərinin açılış mərasimində nümayiş etdiriləcək “Əbədi dostluq və qardaşlıq” sənədli filmi Özbəkistanla Azərbaycan arasında münasibətlərə həsr olunub. Xalqlarımız bir-birinə mənəvi tellərlə bağlanıblar. Bu gün Türkiyə ilə Azərbaycanı mənən birləşdirən “Bir millət, iki dövlət” sözü Özbəkistan və Azərbaycan xalqları üçün də keçərlidir”.

Aktrisa Lalə Eltoyeva, “Kino sənəti” portalının rəhbəri Şakirə Həmro çıxışlarında Azərbaycanda olmaqlarından məmnunluqlarını ifadə edib və iki  ölkə arasında olan sənət mübadiləsindən söz açıblar.

Çıxışlardan sonra “Əbədi dostluq və qardaşlıq” filmi nümayiş etdirilib. Filmdə Azərbaycanla Özbəkistan arasında həm siyasi, həm də mədəni əlaqələrə nəzər salınıb, tarixi faktlar və kadrlar diqqətə çatdırılır. Filmin ssenari müəllifi rejissor Eldar Məmmədovdur.

Qeyd edək ki, Bakıda Özbəkistan kinosu günləri çərçivəsində Azərbaycan kinosevərləri dekabrın 8-də “Maqsud Şeyxzadə” və “Reys 101” filmlərini, dekabrın 9-da isə “Baron – 2” və “Qadın taleyi” adlı ekran əsərlərini izləyəcəklər.

Xatırladaq ki, dekabrın 7-də Azərbaycan Dövlət Film Fondunda “Fəridənin iki min mahnısı” özbək filmi nümayiş etdirilmişdi.

Xəbər lenti