Logo

Psixologiya Elmi-Tədqiqat İnstitutunda "Beyin və davranış laboratoriyası” yaradılıb

22.12.2022 21:41 368 baxış
IMG

Psixologiya Elmi-Tədqiqat İnstitutunda "Beyin və davranış laboratoriyası”nın açılış mərasimi keçirilib.

Tehsil.biz xəbər verir ki, tədbirdə Milli Məclisin Elm və təhsil komitəsinin sədri, Azərbaycan Milli Elmlər Akademiyasının müxbir üzvü, professor Bəxtiyar Əliyev, Psixologiya Elmi-Tədqiqat İnstitutunun sədri, fəlsəfə üzrə fəlsəfə doktoru Elnur Rüstəmov, elm və təhsil nazirinin müşaviri Rüstəm Ağayev, Elm və Təhsil Nazirliyinin  Ümumi və məktəbəqədər təhsilin təşkili və idarə olunması şöbəsinin müdiri Elnur Əliyev, İcbari Tibbi Sığorta üzrə Dövlət Agentliyinin İdarə Heyəti sədrinin müşaviri Nelli Veysova, Bakı Slavyan Universitetinin (BSU) rektoru Anar Nağıyev, Amerika Beynəlxalq  Nevrorequlyasiya və Tədqiqatlar  Dərnəyinin üzvü, Psixologiya Elmi-Tədqiqat İnstitutunun kiçik elmi işçisi, uzman klinik psixoloq Narınc Rüstəmova, mütəxəssislər və tələbələr iştirak ediblər.

Qonaqların laboratoriya ilə tanışlığından sonra tədbiri giriş sözü ilə açan Psixologiya Elmi-Tədqiqat İnstitutunun sədri Elnur Rüstəmov bildirib ki, bu gün institutun, eləcə də ölkəmizin psixologiya tarixində əlamətdar bir gündür:”Beyin və davranış laboratoriyası”nın yaradılmasında məqsəd eksperimental tədqiqatlar aparmaq, əldə olunan nəticələri beynəlxalq nüfuzlu elmi jurnallarda çap etdirmək, peşəkar kadr potensialının hazırlanmasını həyata keçirməkdir”.

E.Rüstəmov, həmçinin qeyd edib ki, Psixologiya Elmi Tədqiqat İnstitutu əlavə təhsil müəssisəsi olaraq Elm və Təhsil Nazirliyi ilə birgə psixoloq və təhsilverənlərin ixtisasartırma təlimlərində fəal iştirak edir.

“İnstitut indiyədək bir neçə yerli  və beynəlxalq elmi konfrans, simpozium, məktəb psixoloqlarının II ümumrespublika konfransı və bir çox elmi tədbirlər təşkil edib”-deyən E.Rüstəmovun sözlərinə görə, institutda dörd kitab, beş metodik vəsait hazırlanıb, dörd məqalə yüksək indeksli elmi jurnallarda dərc olunub və bu işlər uğurla davam etdirilir.

BSU-nun rektoru Anar Nağıyev çıxış edərək psixologiya sahəsində bir çox elmi nailiyyətlər əldə etmiş institutun fəaliyyətini yüksək qiymətləndirib. Rektor vurğulayıb ki, hazırda ölkəmizdə psixologiya sahəsinə maraq böyükdür, ona görə də bu sahədə peşəkar kadr hazırlığına ehtiyac var. A.Nağıyev qeyd edib ki, yaxın günlərdə Bakı Slavyan Universiteti ilə Psixologiya Elmi-Tədqiqat İnstitutunun birgə əməkdaşlığı barədə memorandumun imzalanması nəzərdə tutulur. Rektor laboratoriyanın ölkəmizdə psixologiya sahəsində mühüm yeniliklərə yol açacağına, əsaslı elmi araşdırmalara imkan yaradacağına əminliyini ifadə edib və kollektivə uğurlar arzulayıb.

Daha sonra Psixologiya Elmi-Tədqiqat İnstitutunun əməkdaşı Nadir Əlirazlı, uzman klinik psixoloq Narınc Rüstəmova, Nəzəri və eksperimental psixologiya şöbəsinin müdiri, dosent Məhərrəm Əliyev təqdimatlarla çıxış ediblər.

Qeyd edək ki, “Beyin və davranış laboratoriyası” müasir psixologiya sahəsində tətbiq olunan “QEEG-Quantitative” (Rəqəmsal) Elektroensefaloqramma,  “Neurofeedback”, “Neurofeedback robotu”, “Biofeedback”, “tDCS-Transkranial Birbaşa Cərəyan Stimulyasiyası”, “Virtual Reallıq – VR”, “BETA ALFA”, “Beta One və ya liTMS” və digər ən müasir aparatlarla təchiz olunub.

Xəbər lenti