Dekabrın 28-də Şirvan-Salyan Regional Təhsil İdarəsi tərəfindən eksternat imtahanları keçirilib.

Tehsil.biz xəbər verir ki, imtahanda əvvəlki illərdə ümumi təhsil məktəblərində oxuyub ümumi və ya tam orta təhsil səviyyəsini bitirə bilməyən şəxslər iştirak edib.

Salyan şəhər 2 nömrəli tam orta məktəbdə təşkil olunan imtahana 351 nəfər qatılıb. Onlardan 237 nəfər tam orta, 114 nəfəri isə ümumi orta təhsil haqqında attestat almaq üçün imtahanda iştirak edib. Eksternlər hərəsində 10 sual olmaqla 11 fənn (Ana dili, ədəbiyyat, kimya, fizika, riyaziyyat, informatika, Azərbaycan tarixi, ümumi tarix, biologiya, coğrafiya və xarici di) üzrə imtahan veriblər.

Eksternat imtahanlarında uğur qazanmış şəxslər ümumi və ya tam orta təhsil haqqında sənəd (attestat) almaq üçün Dövlət İmtahan Mərkəzi tərəfindən keçirilən buraxılış imtahanlarında iştirak etmək hüququna sahib olacaqlar.

Qeyd edək ki, sərbəst (eksternat) təhsilalma formasının tətbiqi müxtəlif səbəblərdən tam orta təhsil səviyyəsini başa vura bilməyən şəxslərə həmin səviyyə üzrə buraxılış imtahanı verib müvafiq təhsil sənədi almaq üçün şərait yaratmaq məqsədi daşıyır.