Dövlət İmtahan Mərkəzində Azərbaycan Respublikasının Gənclər və İdman Nazirliyi və respublika idman federasiyalarının nümayəndələri ilə görüş keçirilib.

Tehsil.biz xəbər verir ki, görüşdə DİM-in İmtahanların təşkili və idarə edilməsi departamentinin müdiri Azər Bağırov, Yoxlama-ölçmə materiallarının işlənməsi departamentinin müdiri Natiq Əliyev, Azərbaycan Respublikasının Gənclər və İdman Nazirliyinin İdman şöbəsinin müdiri Elnur Məmmədov və respublikanın 20 idman federasiyasından olan nümayəndələr iştirak edib.

İclas zamanı xüsusi qabiliyyət imtahanlarının təşkili istiqamətində DİM ilə Gənclər və İdman Nazirliyi arasında 9 iyun 2022-ci ildə bağlanan əməkdaşlıq memorandumuna toxunulub, imtahanların nəticələri ilə bağlı hər iki qurumun gözləntiləri haqqında danışılıb.

Görüşdə “Məşqçilik” ixtisası üzrə bu il təşkil olunacaq xüsusi qabiliyyət imtahanlarının hər bir idman növü üzrə məzmunu müzakirə edilib. Bu istiqamətdə Dövlət İmtahan Mərkəzi, Gənclər və İdman Nazirliyi və hər bir idman növü üzrə ixtisaslaşmış federasiyalarla birgə iş aparılacaq.

Abituriyentlərin nəzərinə çatdırırıq ki, 2023/2024-cü tədris ili üçün “Məşqçilik” ixtisası üzrə xüsusi qabiliyyət imtahanlarının qiymətləndirmə normativləri hər bir idman növü üzrə fərqli olacaq. Proqramlar və qaydalar yaxın vaxtlarda “Xüsusi qabiliyyət imtahanları” jurnalında dərc olunacaq.