Azərbaycan Dövlət İqtisad Universitetinin (UNEC) kollektivi Novruz bayramı münasibətilə Bilgəh qəsəbəsindəki Müharibə və əmək əlilləri üçün pansionatının ahıl sakinləri ilə görüşüblər.

Universitetdən "Tehsil.biz"ə verilən məlumata görə, UNEC kollektivi ilə pansionatı ziyarət edən Sosial Xidmətlər Agentliyinin İdarə Heyətinin sədri Vüqar Behbudov, UNEC-in departament direktoru dosent Gülnarə Rzayeva, Həmkarlar İttifaqı Komitəsinin sədri Rüfət Süleymanlı Novruz bayramı münasibətilə pansionatın sakinlərini təbrik edərək, onlara uzun ömür, cansağlığı və xoş günlər arzulayıblar.

UNEC Kitabxana İnformasiya Mərkəzi və Tələbə Həmkarları İttifaqı Təşkilatının Novruz bayramının ənənəvi “papaq atmaq” adətinə uyğun olaraq həyata keçirdiyi “KitabAt” layihəsi çərçivəsində ahıllara kitablar hədiyyə olunub. Sakinlər “KitabAt” layihəsini maraqla qarşılayaraq, sevinclərini ifadə ediblər.

Görüşdə universitetin Yaradıcılıq Mərkəzinin üzvləri pansionat sakinləri qarşısında musiqi və rəqslərlə çıxış ediblər. UNEC kollektivi ahıllarla rəqs edərək, birlikdə unudulmaz anlar yaşayıblar.