Bakı Mühəndislik Universiteti (BMU) və Abşeron Rayon İcra Hakimiyyətinin birgə təşkilatçılığı ilə 31 Mart - Azərbaycanlıların Soyqırımı Gününün 105-ci ildönümünə həsr olunmuş anım tədbiri keçirilib.
Şəhid ailələri, müharibə qazilərinin iştirak etdiyi tədbirdə əvvəlcə universitetin foyesində təşkil olunan sərgiyə baxış keçirilib. Sərgidə Abşeron rayonunda fəaliyyət göstərən orta təhsil müəssisələrinin şagirdlərinin soyqırımla bağlı əl işləri nümayiş olunub.
Dövlət Himninin səsləndirilməsi ilə başlayan tədbirdə faciə qurbanları, torpaqlarımızın azadlığı uğrunda canından keçmiş şəhidlərimizin əziz xatirəsi bir dəqiqəlik sükutla yad olunub, ardınca mart qırğınlarına həsr olunmuş sənədli film nümayiş etdirilib.
Tədbirdə çıxış edən BMU-nun rektoru, professor Havar Məmmədov erməni millətçilərinin mifik “Böyük Ermənistan” ideyasını gerçəkləşdirmək məqsədilə xalqımıza qarşı tarix boyu məqsədyönlü, düşünülmüş və planlı şəkildə həyata keçirdiyi soyqırımı, etnik təmizləmə və deportasiya siyasətinə diqqət çəkib. Xalqımızın qan yaddaşında 200 il ərzində dəhşətli iz buraxan böyük faciələrdən birinin 31 Mart tarixi olduğunu önə çəkən rektor qeyd edib ki, 1918-ci ilin 30 mart və 3 aprel tarixləri arasında bolşevik-erməni silahlı dəstələri tərəfindən Azərbaycan torpaqlarında kütləvi qırğınlar gerçəkləşdirilib. Mart soyqırımlarının öz amansızlığına və miqyasına görə, bütövlükdə bəşər tarixində ən qanlı faciələrdən olduğunu söyləyən Havar Məmmədov sovet dövründə tarixin təhrif edildiyini, əsl həqiqətlərin, erməni qəsbkarlarının xalqımıza, bəşəriyyət əleyhinə törətdikləri çoxsaylı cinayətlərin gizlədildiyini bildirib.
Ermənilərin xalqımıza qarşı soyqırımlarının ölkə hüdudlarından kənarda tanıdılmasında ulu öndər Heydər Əliyevin misilsiz xidmətlərini vurğulayan rektor qeyd edib ki, Ümummilli Liderin 1998-ci il martın 26-da “Azərbaycanlıların soyqırımı haqqında” imzaladığı Fərmanla faciəyə adekvat siyasi qiymət verilib.
Ermənilərin törətdikləri genosid aktlarının beynəlxalq ictimaiyyətə tanıdılması istiqamətində dövlətimiz tərəfindən davam etdirilən fəaliyyətə, Prezident cənab İlham Əliyevin qətiyyətli mövqeyinə diqqət çəkən rektor əlavə edib ki, erməni vəhşiliklərini dünyaya çatdırmaq, eləcə də soyqırımı qurbanlarının xatirəsinin əbədiləşdirmək məqsədilə dövlət başçımızın 30 dekabr 2009-cu il tarixli Sərəncamı ilə Quba şəhərində “Soyqırımı Memorial Kompleksi“ yaradılıb.
Ermənilərin tarix boyu xalqımıza qarşı törətdikləri bütün cinayətlərin cavabının 2020-ci ilin sentyabrında başlayan və Müzəffər Ali Baş Komandan İlham Əliyevin rəhbərliyi ilə 44 gün davam edən Vətən müharibəsində verildiyini vurğulayan Havar Məmmədov gənclərə tarixin bütün məqamlarını, xalqımızın keçmişdə hansı fəlakətlərlə üz-üzə qaldığını dərindən öyrənmələrini tövsiyə edib.
Abşeron rayon İcra Hakimiyyətinin başçısınin müavini Gülnar Rəhimova azərbaycanlılara qarşı törədilən soyqırımı aktlarını diqqətə çatdıraraq, tarixi yaddaşımızda yer alan qanlı səhifələrin məhz erməni vandalları tərəfindən aparılan işğalçı siyasətin tərkib hissəsi olduğunu nəzərə çatdırıb. 31 Mart soyqırımı zamanı on minlərlə dinc azərbaycanlının yalnız milli mənsubiyyətinə görə amansızcasına qətlə yetirildiyini bildirən Gülnar Rəhimova həmin dövrdə Bakıda, Şamaxıda, Qubada, Qarabağda, Zəngəzurda, Naxçıvanda, Lənkəranda, Gəncədə və digər bölgələrdə azərbaycanlı əhaliyə qarşı törədilən ağılasığmaz vəhşiliklərdən, günahsız insanların xüsusi qəddarlıqla qətlə yetirilməsindən ətraflı danışıb. Tarixi zəfərlə başa çatan Vətən müharibəsində xalqımıza qarşı törədilən bütün cinayətlərə layiqli cavab verildiyini deyən icra başçısının müavini bizə şanlı qələbəni bəxş edən şəhidlərə, qazilərə ölkə Prezidentinin rəhbərliyi ilə göstərilən diqqət və qayğını xüsusi vurğulayıb.
Ermənilərin davamlı genosid və işğalçılıq siyasətindən bəhs edən YAP Abşeron rayon təşkilatının sədri Abbas Əliyev Prezident, Ali Baş Komandan İlham Əliyevin rəhbərliyi altında rəşadətli Azərbaycan Ordusunun Ermənistanın ardıcıl təxribatlarının və yeni işğal planlarının qarşısını alınması istiqamətində konkret addımlar atdığını və Şanlı Zəfərlə buna son qoyulduğunu bildirib. Təşkilat sədri bu tarixi qalibiyyətin qazanılmasında borclu olduğumuz şəhidlərin əziz xatirəsinin heç zaman unudulmayacağını deyib.
Şəhid anaları, müəllimələr - Elçin Həsənlinin anası Xatirə İsmayılova və Şamil Nəcəfovun anası Gülşən Qazanxanova da ermənilərin əsrlər boyu xalqımıza qarşı ardıcıl şəkildə yürütdüyü terror, kütləvi qırğın, deportasiya və etnik təmizləmə siyasətini faktlarla qeyd ediblər. Vətən müharibəsi ilə bu faciə qurbanlarının qisasının alındığını deyən şəhid valideynləri tələbələrə tövsiyələrini veriblər, onların Vətənə bağlı, bilikli, vətənpərvər gənc nəsil kimi formalaşması üçün üzərlərinə düşən vəzifələri vurğulayıblar.
BMU Tələbə Həmkarlar İttifaqı Komitəsinın (THİK) sədri Ləman Şərifova da çıxış edərək, Azərbaycanlıların Soyqırımı Günü ilə bağlı gənclər adından fikirlərini çatdırıb.
