"Ötən ilin sonu Prezident İlham Əliyev İKT sektorunda inkişafa ciddi təkan verəcək bir sıra yeni sənədlər imzalayıb. Onlardan biri və ən əhəmiyyətlisi də texnoparka rezidentlik statusu alan hüquqi və fiziki şəxslərlə bağlıdır".

Tehsil.biz xəbər verir ki, bunu Azərbaycan İnternet Forumunun prezidenti Osman Gündüz deyib.

O bildirib ki, bu statusu alanlar 10 il müddətinə vergilərdən (gəlir və mənfəət vergisi, dividend, əmlak, torpaq) azad olunurlar, sosial sığortahaqları ilə bağlı ciddi güzəştlər verilir: "Texnoparkdan kənar fəaliyyət göstərən əcnəbi mütəxəssislərə iş icazəsinin alınması da tələb olunmur. Düşünürəm ki, güzəştlərin şamil olunduğu İT şirkətlərin fəaliyyət istiqaməti xeyli məhdud (sistem inteqrasiyası və proqram təminatı istehsalı) olsa da, qəbul olunan sənədlər sektorun inkişafı üçün mühüm əhəmiyyət kəsb edir".

Osman Gündüz

O.Gündüz qeyd edib ki, uzun müddətdən bəri gözlənilən bu güzəştlərin qəbulu istiqamətində  RİNN-in apardığı sistemli işlər də diqqət çəkən olub: "Görəsən Prezidentin bu fərmanı necə icra olunur,  indiyədək bu güzəştlər kimlərə şamil olub, proses necə baş verir? Qısa bir araşdırma ilə müəyyən etmək olar ki, bu sahədə səlahiyyətli qurum olan RİNN-nin İnnovasiya və Rəqəmsal İnkişaf Agentliyi cəmi bir dəfə bir neçə şirkətə texnopark rezidentliyi statusu Şəhadətnaməsinin verilməsi haqqında qısa bir məlumat paylaşıb. Status alan şirkətlərin adları açıqlanmayıb. Vəssalam. Hələlik bununla bağlı başqa məlumat tapmaq mümkün deyil".

Osman Gündüzün fikrincə, bu güşətlərin tətbiqi ilə bağlı İRİA tərəfindən aparılan işləri heç bir halda yetərli hesab etmək olmaz: "Onsuz da biz bu sahədə bir xeyli ləngimişik. Gərəkdir ki, İRİA güzəştlərdən bəhrələnənlərin sayının artması üçün ciddi işlər aparsın. Təəssüf ki, bu sahədə hələlik şəffaflıq da yetərli deyil. Maraqlandığım iddiaçıların heç bilri bilmir ki, proses necə təşkil olunur, meyarlar nədir, kimlərə şamil olunur, qərarlar necə qəbul edilir, kimlər iştirak edir? Düşünürəm ki, İRİA-nın bu prosesin təşkilinə maraqlı tərəfləri cəlb etməsi, prosesi şəffaf qurması, qəbuledilən müraciətlər, güzəştlərdən bəhrələnənlər və imtinalarla bağlı ətraflı məlumatlar verməsi çox vacibdir. Ümid edirəm RİNN və İRİA qərarların qəbulu prosesinin şəffaf və maraqlı tərəflərin iştirakı ilə qurulmasına, hesabatlılığın təmin edilməsinə diqqəti artıracaq".

Kənan Nağıbəyli