Əlcəzairin “Jeel dz TV” telekanalının səhər proqramında müsəlman ölkələrində, o cümlədən Misir, Livan, Pakistan və Azərbaycanda Qurban bayramının keçirilmə ənənələrindən bəhs edilib.

Tehsil.biz xəbər verir ki, Əlcəzairdə yaşayan Azərbaycan diasporunun fəal üzvü Xumar Nəbiyeva ölkəmizdə bu bayramın necə qeyd edilməsi barədə ətraflı məlumatla çıxış edib.

Proqramın aparıcılarını və tamaşaçılarını doğma dilimizdə “Sabahınız xeyir! Qurban bayramınız mübarək!” sözləri ilə salamlayan milli geyimli soydaşımız çıxışını fransız dilində davam etdirib. Bildirib ki, Qurban bayramı Azərbaycanda milli bayram kimi rəsmi şəkildə qeyd edilir. O, bayramqabağı həyata keçirilən hazırlıq işlərindən, milli adət-ənənələrdən, süfrəyə düzülən milli mətbəx nümunələrindən danışıb.

Proqramın gedişində Livanda Qurban bayramı zamanı düzəldilən səməninin dənizə buraxıldığı vurğulanıb. Xumar Nəbiyeva nəzərə çatdırıb ki, Azərbaycanda səməni Novruz bayramının rəmzlərindən biridir. Diaspor fəalı əlcəzairli tamaşaçılara Azərbaycan kəlağayıları və xalçaları barədə də məlumat verib.