Kembric Universiteti Nəşriyyat və Qiymətləndirmə qurumunun rəsmi test mərkəzi olan Dövlət İmtahan Mərkəzi (DİM) ingilis dili müəllimləri üçün bilik və bacarıqları beynəlxalq səviyyədə təsdiq edən TKT (Teaching Knowledge Test) kvalifikasiyasının modulları üzrə imtahan keçirəcək.

DİM-dən "Tehsil.biz"ə bildirilib ki, imtahan TKT Modul 1, TKT Modul 2, TKT Modul 3, TKT Modul YL (Young Learners – azyaşlı öyrənənlərə dilin tədrisi), TKT Modul CLIL (Content and Language Integrated Learning – dilin məzmunla inteqrativ tədrisi) üzrə keçiriləcək. İmtahan oktyabrın 28-də DİM-in Akademik Həsən Əliyev küçəsi, 299 ünvanında yerləşən inzibati binasında təşkil ediləcək.

İmtahan vermək üçün sentyabrın 13-dək qeydiyyatdan keçmək lazımdır.

Xatırladaq ki, DİM Kembric ingilis dili üzrə qiymətləndirmə (Cambridge English Qualifications), Kembric ingilis dili üzrə tədris (Cambridge English Teaching) imtahanlarını təklif edir. DİM tələb əsasında Kembric ingilis dili üzrə səviyyə testi (Cambridge English Placement Test - CEPT) də təşkil edir.

Əlavə məlumat üçün [email protected] ünvanına yazmaq olar.