AMEA-nın Gəncə Bölməsində görkəmli ictimai xadim, maarifçi, müəllim, ədəbiyyatşünas Abdulla Surun anadan olmasının 140 və Milli Mətbuatımızın yaranmasının 148-ci ildönümünə həsr edilmiş dəyirmi masa keçirilib.
AMEA-dan "Tehsil.biz"ə bildirilib ki, tədbirdən öncə dəyirmi masa iştirakçıları Abdulla Surun və Milli Mətbuatımızın görkəmli nümayəndələrindən Əsgər ağa Goraninin məzarlarını ziyarət ediblər.
Sonra AMEA-nın Gəncə Bölməsinin müşavirə salonunda mövzu üzrə dəyirmi masa keçirilib. Bölmənin sədrinin müavini Sara Əzizova tədbiri giriş sözü ilə açaraq, Abdulla Surun Azərbaycan ədəbiyyatşünaslıq və maarifçilik, o cümlədən mətbuat tarixində xüsusi izə malik olan şəxsiyyət olduğunu diqqətə çatdıraraq, bugünkü tədbirdə səslənəcək çıxışları millətimizin tərəqqisinə xidmət etmiş Gəncənin işıqlı simalarının həyat və fəaliyyətinin öyrənilməsinə daha bir töhfə kimi dəyərləndirib.
Sonra mövzular üzrə çıxışlar olub.
AMEA-nın Gəncə Bölməsinin Nizami Gəncəvi Mərkəzinin direktoru, f.ü.f.d. Əlimuxtar Muxtarov “Abdulla Surun Azərbaycan ədəbi və ictimai fikir tarixində mövqeyi”, AMEA-nn Gəncə Bölməsinin Elmi kitabxanasının müdiri Vüsalə Hüseynova “Abdulla Surun maarifçilik fəaliyyəti”, AMEA-nın Gəncə Bölməsinin Nizami Gəncəvi Mərkəzinin kiçik elmi işçiləri Aynur Mirişli “Abdulla Sur Əhməd Cavadın gözü ilə”, Leyla Kərimova “Abdulla Sur və Gəncə”, Gəncə Dövlət Universitetinin Azərbaycan və dünya ədəbiyyatı kafedrasının müdiri, dosent Səba Namazova “Böyük sənət və ədəbiyyat sevdalısı Abddulla Sur”, Əməkdar jurnalist, yazıçı, publisist Nüşabə Əsəd Məmmədli “Gəncə şəhərində Abdulla Surun adının əbədiləşdirilməsi”, “Gəncənin səsi” qəzetinin baş redaktoru Rəfiqə Sadıqova “Gəncənin 103 yaşlı mətbuat orqanı - “Gəncənin səsi” qəzeti”, Azərbaycan Yazıçılar Birliyinin Gəncə Bölməsinin sədri Xəzangül Hüseynova “Abdulla Surun poetik dünyası”, AMEA-nın Gəncə Bölməsi İctimaiyyətlə əlaqələr şöbəsinin müdiri Zakir Muradov “Milli mətbuatımızın yaranmasında Gəncədən olan görkəmli ictimai xadimlərimizin rolu”, Abdulla Surun yaxın qohumu, Azərbaycan Dövlət Aqrar Universitetinin Fizika və riyaziyyat kafedrasının müdiri, dosent Qalib Ağayev “Abdulla Sur haqqında atamın xatirələri” mövzuları üzrə çıxış ediblər.
