Lənkəran Regional Elmi Mərkəzinin elmi işlər üzrə direktor müavini, dosent Sevinc Hüseynovanın həmmüəllif olduğu məqalə Ukraynanın “The Journal of Neuroscience of B.M.Mankovskyi” (“B.M.Mankovski adına Nevrologiya jurnalı”) jurnalında çap olunub.

Bu barədə "Tehsil.biz"ə AMEA-dan bildirilib.

“Geography of population longevity in Аzerbaijan” (“Azərbaycan əhalisinin uzunömürlülük coğrafiyası”) adlı məqalədə Azərbaycanın bütün bölgələrində üzünömürlülük indeksi əks olunan xəritə verilib, uzunömürlü populyasiyaların adaptiv xüsusiyyətlərinin ekoloji və genetik faktorlarla bağlılığı göstərilib. Xüsusilə qeyd olunub ki, tarixi torpaqları olan Qarabağdan uzaqda müxtəlif sosial-ekoloji şəraitdə yaşamış bu populyasiyalar öz adaptiv xüsusiyyətlərini, həyat tərzini, ənənələrini və bunun nəticəsində uzunömürlülük fenomenini qoruyub saxlaya bilmişlər.

Nəticədə bildirilir ki, Azərbaycanda uzunömürlülük fenomeninin araşdırılmasında müasir klinikanın istifadəsi, instrumental, molekulyar-genetik və biokimyəvi üsullarla deşifrəsi insan uzunömürlülüyünün mürəkkəb mexanizmlərinin həm fərdi, həm də populyasiya səviyyəsində və yaşlanma tədqiqatlarında yeni üfüqlər açacaq.