“BDU könüllüləri” təşkilatının “Lin-Orph” musiqi klubunun təşkilatçılığı ilə 5 Dekabr – Beynəlxalq Könüllülər Gününə həsr olunmuş konsert proqramı təşkil olunub.

Bu barədə "Tehsil.biz"ə BDU-dan məlumat verilib.

Proqramda “Xəzərin sahilində”, “Məhəbbət çırağı”, “Azərbaycan”, “Xatirə” kimi musiqi nömrələri səsləndirilib.

Qeyd edək ki, BMT Baş Assambleyasının 1985-ci il dekabrın 17-də qəbul etdiyi qətnaməyə əsasən, hər il dekabrın 5-i dünyada Beynəlxalq Könüllülər Günü kimi qeyd olunur. 2019-ci ildən fəaliyyət göstərən “BDU könüllüləri” təşkilatı hazırda öz ətrafında 1000-ə yaxın tələbəni birləşdirir. Təşkilat 2020-ci ildən başlayaraq bir sıra uğurlu layihələr həyata keçirib, BDU-da könüllülük hərəkatının genişlənməsində, tələbə təşkilatları ilə birgə sosial və mədəni-kütləvi tədbirlərin təşkilində fəal iştirak edib.

Hazırda könüllü tələbələr BDU-nun müxtəlif struktur bölmələrində fəaliyyət göstərməklə universitetin ictimai həyatında fəal iştirak edirlər. Bu ilin ilk yarısında “BDU könüllüləri” təşkilatının təşəbbüsü ilə müxtəlif səpkili 77 sosial və mədəni-kütləvi tədbir keçirilib.