Diasporla İş üzrə Dövlət Komitəsinin sədrinin birinci müavini Valeh Hacıyev Şimali Kipr Türk Cümhuriyyətində (ŞKTC) fəaliyyət göstərən Çağdaş Musiqi Dərnəyinin üzvlərindən ibarət nümayəndə heyəti ilə görüşüb.

Tehsil.biz xəbər verir ki, qonaqları salamlayan V.Hacıyev onlara komitənin fəaliyyəti və həyata keçirdiyi layihələr barədə məlumat verib. Türk dövlətləri arasında əməkdaşlığın günü-gündən genişləndiyini, ŞKTC-nin Türk Dövlətləri Təşkilatına müşahidəçi statusla üzvlüyünün bu əməkdaşlığı daha da genişləndirdiyini vurğulayaraq, Girnə şəhərində Azərbaycan Evinin fəaliyyətə başlayacağını bildirib.

Səmimi qəbula görə təşəkkür edən ŞKTC-nin Bakı təmsilçisi Ufuk Turganer və Çağdaş Musiqi Dərnəyinin sədri Ersin Tünay Şimali Kiprlə Azərbaycan arasında humanitar və mədəni əlaqələrin səviyyəsinin getdikcə yüksəlməsindən məmnunluqlarını bildiriblər.

Görüşdə Azərbaycan-Kipr Dostluq Cəmiyyətinin sədri Orxan Həsənoğlu da iştirak edib.

Qeyd edək ki, kiprli musiqiçilər Naxçıvan Muxtar Respublikasının 100 illik yubileyi tədbirləri çərçivəsində fevralın 11-də Naxçıvanda “Tək Səs Tək Ürək” adlı konsert proqramı ilə çıxış ediblər. Fevralın 14-də isə Bakıda Nizami Kino Mərkəzində səhnəyə çıxacaqlar.