Azərbaycan Memarlıq və İnşaat Universitetinin (AzMİU) təbliğat-təşviqat qrupunun “Gələcəyinin memarı ol” devizi altında apardığı kampaniya uğurla davam edir.

AzMİU-dan "Tehsil.biz"ə bildirilib ki, bu dəfə Memarlıq və Dizayn fakültələrinin əməkdaşları, müəllim və tələbələri təbliğat-təşviqat kampaniyası çərçivəsində Sumqayıt məktəbliləri ilə görüşüblər.

Sumqayıt şəhəri İstedad liseyi, Təbiət Elmləri Təmayüllü Gimnaziya, N.Tusi adına 12 nömrəli və 15 nömrəli tam orta məktəblərdə keçirilən görüşlərdə şagirdlərə AzMİU-nun üstünlükləri, tədris prosesi, fakültələri, ixtisasları və onların təcrübə imkanları, beynəlxalq əlaqələri, ikili diplom layihələri ətrafında məlumat verilib. Universitet əməkdaşları xüsusi qabiliyyət tələb edən memarlıq və dizayn ixtisaslarına müsabiqə şərtləri, tələb olunan əsas göstəriciləri barədə də danışıblar.

Yekunda universitet nümayəndələri tərəfindən AzMİU-nun tanıtım videoçarxı təqdim olunub, abituriyentlərin sualları cavablandırılıb.

Qeyd edək ki, AzMİU-nun təbliğat-təşviqat qrupu bundan öncə də paytaxt və bölgələrdə məktəblilərlə görüşüb, gələcəyin tələbələrinə universitetin ixtisasları, fakültələri, təhsil imkanlarından bəhs ediblər.