Logo

III Bakı Elm Olimpiadasının final mərhələsinin ilk turu keçirilib

16.05.2024 14:04 172 baxış
IMG

Ümummilli Lider Heydər Əliyevin anadan olmasının 101-ci ildönümünə həsr edilmiş III Bakı Elm Olimpiadasının final mərhələsinin nəzəri hissəsi keçirilib.

Bu barədə "Tehsil.biz"ə Bakı Şəhəri üzrə Təhsil İdarəsindən (BŞTİ) məlumat verilib.

Bildirilib ki, BŞTİ-nin tabeliyindəki ümumi təhsil müəssisələrinin şagirdləri arasında təşkil olunan olimpiadanın I mərhələsində ən yüksək nəticə göstərən 24 komanda - 287 nömrəli Zəkalar liseyi, Məktəb-Lisey Kompleksi, 2 nömrəli Texniki Humanitar Liseyi, Bakı Slavyan Universiteti nəzdində Məktəb-Lisey Kompleksi, 291 nömrəli Ekologiya liseyi, 220 nömrəli məktəb-lisey və 272, 233, 129, 80, 280, 27, 53, 267, 194, 254, 24, 180, 42, 202, 322, 191, 169, 264 nömrəli tam orta məktəblərin komandaları final mərhələsində iştirak ediblər.

IX və X sinif şagirdləri arasında keçirilən olimpiadanın final mərhələsinin nəzəri hissəsi Məktəb-Lisey Kompleksində təşkil olunub.

Olimpiadanın final mərhələsinin ilk turunda komandalar 3 saat ərzində hər fənn üzrə 5 qapalı və 1 açıq tipli (nəzəri) tapşırığı (ümumilikdə 15 qapalı və 3 açıq tipli (nəzəri) tapşırıq) cavablandırıblar.

Mayın 17-də Bakı Ali Neft Məktəbində keçiriləcək final mərhələsinin II turunda isə məktəblilər 4 saat ərzində hər fənn üzrə (fizika, kimya, biologiya) 1 təcrübə işini (ümumilikdə 3 təcrübə işi) yerinə yetirəcəklər.

Qaliblərə BŞTİ tərəfindən diplom, medal və hədiyyələr təqdim ediləcək. Həmçinin final mərhələsinə keçən və ən yüksək bal toplayan komandalar və şagirdlər diplomla təltif olunacaqlar.

Qeyd edək ki, Bakı Şəhəri üzrə Təhsil İdarəsi və Bakı Ali Neft Məktəbinin birgə təşkilatçılığı ilə keçirilən olimpiadanın əsas məqsədi şagirdlərin təbiət elmlərinə (fizika, kimya, biologiya) olan marağını daha da artırmaq, bu sahədə nəzəri-təcrübi biliklərini təkmilləşdirmək, onların praktik və yaradıcılıq bacarıqlarının inkişaf etdirilməsinə şərait yaratmaq, istedadlı şagirdləri aşkar etməkdən ibarətdir.

Xəbər lenti