Azərbaycan Dövlət Pedaqoji Universitetində (ADPU) “Pedaqoji Universitetin gələcək təhsil liderləri” müsabiqəsinin final mərhələsi keçirilib.
ADPU-dan "Tehsil.biz"ə bildirilib ki, finala vəsiqə qazanan 66 iştirakçı komandalar halında layihə hazırlanması və təqdim olunması, böhran vəziyyətlərində idarəetmə, GZİT analizi, kreativ yanaşma kimi istiqamətlər üzrə müvafiq keyslər yerinə yetirib, layihə təkliflərini münsiflər qarşısında təqdim ediblər.
Proses boyu ekspertlər tərəfindən iştirakçıların həm komanda halında işləmə bacarıqları, həm də fərdi keyfiyyətləri meyarlar əsasında qiymətləndirilib. Münsiflər heyəti arasında ADPU-nun rektoru professor Cəfər Cəfərov, prorektorlar Eldar Aslanov, Asəf Zamanov və Fikrət Rzayev, rektorun müşaviri Ümid Mehdiyev, Pedaqoji Kollecin direktoru İsrayıl İsgəndərov, Təlim-Tədris Mərkəzinin müdiri Xalidə Həmidova, Tədbirlərin təşkili və tələbələrlə iş şöbəsinin müdiri Turan Kərimli və Bakı Dövlət Universitetinin Coğrafiya fakültəsinin tədris işləri üzrə direktor müavini, ADPU Gənc Məzunlar Assosiasiyasının sədri Eltac Cəbiyev təmsil olunublar.
Müsabiqənin yekun nəticələrinin yaxın günlərdə açıqlanacağı gözlənilir.
ADPU və onun filiallarının bakalavriat və magistratura səviyyəsində təhsil alan tələbələr üçün təşkil olunan “Pedaqoji Universitetin gələcək təhsil liderləri” müsabiqəsinin keçirilməsində əsas məqsəd istedadlı tələbələrini aşkar edərək onların peşəkar inkişafına dəstək olmaq və gələcək kadr bankı formalaşdırmaqdır.
“Sən də bacararsan!” şüarı ilə keçirilən müsabiqənin 10 qalibinin hər birinə 1000 manat məbləğində pul mükafatı və digər hədiyyələr, xarici dil və informasiya texnologiyaları üzrə ödənişsiz kurslar, Təşkilat Komitəsi tərəfindən təyin olunacaq mentorlarla 1 illik peşəkar inkişaf proqramı (proqramın sonunda müvafiq referans məktubu veriləcək) və kadr bankına əlavə olunma imkanı təqdim olunur. Eyni zamanda, xüsusi fərqlənən əlavə 10 nəfər iştirakçı da həvəsləndirici mükafata layiq görüləcək və onlar da mentorluq proqramına cəlb olunacaqlar. Həmçinin müsabiqənin finalçıları kadr bankına əlavə olunmaqla onlara da müvafiq sertifikatlar və hədiyyələr veriləcək.
