Azərbaycan Dövlət Pedaqoji Universitetinin (ADPU) Quba filialında Nizami Gəncəvi adına Daşkənd Dövlət Pedaqoji Universitetinin Peşə təhsili fakültəsinin dekanı dosent Maxmudcan Kadirov və Təsviri incəsənət kafedrasının müdiri professor Urinbay Nurtayevlə görüş keçirilib.

ADPU-dan "Tehsil.biz"ə bildirilib ki, filialın Azərbaycan-Özbəkistan Türk Dünyası Tanıtım və Kültür Mərkəzində keçirilən görüşdən öncə iki qardaş ölkənin tarixi, bu günü və təhsil sistemindəki oxşarlıqlar və fərqliliklərindən danışılıb. Sonra qonaqlar Mərkəzlə tanış olub, eksponatlar və stendlər haqqında məlumat alıblar.

Tədbirdə çıxış edən filialın direktoru dosent Yusif Alıyev qeyd edib ki, Azərbaycan Respublikasının Prezidenti İlham Əliyevin və Özbəkistan Respublikasının Prezidenti Şavkat Mirziyoyevin rəhbərliyi ilə iki ölkə arasında yaranan əlaqələrin inkişafı bütün sahələrdə sürətlə davam edir. Bu kontekstdə ADPU da qardaş Özbəkistan universitetləri ilə ədəbiyyat, mədəniyyət sahəsində birgə elmi-tədqiqat işlərinin həyata keçirilməsi istiqamətində fəaliyyətlər icra edir.

Görüşdə qonaqlar Azərbaycan-Özbəkistan Türk Dünyası Tanıtım və Kültür Mərkəzinin fəaliyyətini yüksək qiymətləndiriblər.

Tədbirdə çıxış edən müəllim və tələbələr universitetlər arasında qurulacaq əlaqələrə istiqamət verən fikirlər səsləndiriblər.

Tələbələr növbəti görüşlərdə qardaş özbək tələbələrinin də iştirak etməsini arzuladıqlarını və özlərinin də Özbəkistana getmək istəklərini bildiriblər. Onlardan Günəş İskəndərovanın səsləndirdiyi şeirlər, Əminə Vəliyeva, Tofiq Dadaşov və Gülyanaq Əhmədovanın ifasında təqdim olunan özbək və Azərbaycan musiqi nömrələri qonaqlara yaddaqalan anlar yaşadıb.