Logo

Fırat Universitetinin əməkdaşları ADU-da olublar - FOTO

08.06.2024 11:00 132 baxış
IMG

Türkiyənin Fırat Universitetinin Tədris işləri üzrə prorektoru, professor Mehmet Yılmaz və Beynəlxalq əlaqələr şöbəsinin xarici əlaqələr üzrə koordinatoru İzzet Taşar Azərbaycan Dillər Universitetinin qonağı olub.

 Bu barədə "Tehsil.biz"ə ADU-dan bildirilib.

Görüşdə ADU-nun rektoru, akademik Kamal Abdulla və universitetin digər rəhbər şəxsləri iştirak ediblər.

Akademik Kamal Abdulla qonaqları səmimi qarşılayaraq, onları universitetdə görməkdən məmnun olduğunu bildirib. Azərbaycan Dillər Universitetinin dünyanın bir çox xarici universitetləri ilə əlaqələrinin uğurla inkişaf etdiyini vurğulayan rektor bugünkü görüşü Fırat Universiteti ilə elmi əməkdaşlığın qurulması üçün yeni perspektivlərin ilk müjdəçisi hesab etdiyini qeyd edib.

Səmimi qarşılanmaya və xoş sözlərə görə təşəkkürünü bildirən professor Mehmet Yılmaz ADU-nun uğurlarının yeni müstəvidə öyrənilməsinin vacibliyini vurğulayıb. O, iki universitet arasında müəllim və tələbə mübadiləsinin aparılması imkanlarının olduğunu qeyd edib və bu istiqamətdə əməkdaşlığın əhəmiyyətindən danışıb.

Akademik Kamal Abdulla müəllim və tələbələrin təcrübə proqramlarına qoşulmasının, xarici dillərin yeni metodlarla tədrisinin qarşılıqlı şəkildə öyrənilməsinin önəmini bildirib. O, ADU-nun bu istiqamətdə atdığı addımların və əldə etdiyi nailiyyətlərin iki universitet arasındakı əməkdaşlıq üçün möhkəm təməl yaradacağını vurğulayıb.

Görüşdə gələcək elmi layihələrin birgə həyata keçirilməsi və təcrübə proqramlarının qarşılıqlı şəkildə tətbiq olunmasının mümkünlüyü ətrafında müzakirələr aparılıb. Hər iki tərəf elmi və akademik əməkdaşlıq üçün konkret addımlar atmaq və bu istiqamətdə müvafiq tədbirlər görmək barədə razılığa gəliblər.

Qeyd olunub ki, bu görüş Azərbaycan Dillər Universiteti ilə Fırat Universiteti arasında elmi və mədəni əlaqələrin qurulması və yeni əməkdaşlıq imkanlarının yaradılması üçün mühüm addımdır. Həmçinin bu görüş iki qardaş ölkə arasında elmi və mədəni əlaqələrin daha da gücləndirilməsinə xidmət edəcək. Görüşün sonunda hər iki tərəf universitetlərarası əlaqələrin qurulması və inkişaf etdirilməsi, qarşılıqlı dəstəyin artırılması üçün çalışacaqlarını bəyan ediblər.

Xəbər lenti