Alimlərin "planet qatili" adlandırdıqları böyük asteroid "2011 UL21" Yerə doğru hərəkət edir.

Tehsil.biz bu barədə xarici KİV-ə istinadən məlumat verir.

Astronomların fikrincə, iyunun 27-də o, bizə 6,6 milyon kilometr məsafəyə qədər yaxınlaşacaq.

Qeyd olunub ki, bu asteroid son 125 ildə Yerə yaxınlaşan ən böyük asteroidlərdən biri hesab olunur. Asteroidin eni 1,7 - 3,9 kilometrdir. Bu, əvvəllər kəşf edilmiş Yerə yaxın asteroidlərin 99%-dən böyükdür. Bununla belə, "2011 UL21"in 66 milyon il əvvəl dinozavrları məhv etdiyi güman edilən asteroiddən təxminən beş dəfə kiçik olduğu hesab olunur. Nəzəri hesablamalara görə, Yerin 93 000 kilometr/saat sürətlə hərəkət edən belə bir asteroidlə toqquşması kontinental miqyasda fəsadlar törədə, eləcə də atmosferə iqlimi dəyişmək üçün kifayət qədər həcmdə süxur buraxa bilər. Teleskoplar vasitəsilə "2011 UL21"i ən yaxşı iyunun 28-dən 29-na keçən gecə müşahidə etmək mümkün olacaq. Asteroidin parlaqlığı Proksima Sentavra ilə müqayisə edilə biləcək dərəcədə olacaq.

"2011 UL21"in Yerə növbəti yaxınlaşması 2089-cu ildə proqnozlaşdırılır və bundan sonra asteroid cəmi 2,7 milyon kilometr məsafədə uçacaq.