Son illərdə məktəbli avtobuslarının təhsil sistemində rolu geniş müzakirə mövzusuna çevrilib. Əsasən regionlarda yaşayan məktəblilərin təhsil müəssisələrinə vaxtında və təhlükəsiz çatdırılması, valideynlər üçün ciddi narahatlıq doğurur. Təhsil tədqiqatçısı Bəhman Hüseynli bu məsələdə məktəbli avtobuslarının əhəmiyyətini vurğulayır və onların təhsil prosesinə birbaşa təsir göstərdiyini qeyd edir.

Hüseynliyə görə, məktəbli avtobusları uşaqların təhlükəsizliyinin təmin olunması ilə yanaşı, onların məktəbə davamlı və vaxtında gəlməsini də asanlaşdırır. “Xüsusilə kənd yerlərində və şəhər mərkəzlərindən uzaq ərazilərdə yaşayan şagirdlər üçün avtobus xidməti onların təhsilə çıxışını təmin edir. Uşaqların hər gün uzun məsafə qət etmədən məktəbə çatdırılması, onların dərsə olan marağını və müvəffəqiyyət səviyyəsini artırır,” - deyə Hüseynli qeyd edir.

Bununla belə, Bəhman Hüseynli məktəbli avtobuslarının yalnız fiziki çatdırılma vasitəsi kimi görülməməsi, eyni zamanda təhsil siyasətinin bir hissəsi kimi düşünülməli olduğunu vurğulayır. “Avtobuslar həm də sosial bərabərsizliklərin aradan qaldırılmasında mühüm rol oynayır. Bəzi ailələr uşaqlarını məktəbə özəl nəqliyyat vasitələri ilə apara bilmədikdə, avtobus xidməti bu fərqi aradan qaldıraraq bütün uşaqlara bərabər təhsil imkanı yaradır,” - o bildirir.

Hüseynli, məktəbli avtobuslarının texniki vəziyyətinə və sürücülərin peşəkarlığına da diqqət çəkir. O, avtobusların müasir təhlükəsizlik standartlarına uyğun olması və sürücülərin xüsusi təlim keçməsi zərurətini vurğulayır: “Uşaqların təhlükəsizliyi prioritet olmalıdır. Avtobuslar müntəzəm olaraq texniki baxışdan keçirilməli və sürücülər müvafiq təlimlər almalıdır ki, yolda hər hansı xoşagəlməz hadisələrin qarşısı alınsın.”

Sonda, Hüseynli məktəbli avtobuslarının təkcə nəqliyyat xidməti deyil, təhsil infrastrukturunun vacib bir hissəsi olduğunu və dövlətin bu sahəyə daha çox diqqət ayırmasının vacibliyini qeyd edir. “Təhsilin əlçatan olması hər bir uşağın haqqıdır. Məktəbli avtobusları bu əlçatanlığı təmin edən ən vacib vasitələrdən biridir,” - deyə o, fikrini yekunlaşdırır.