Noyabrın 2-də 41-ci İstanbul Beynəlxalq Kitab Sərgisinin açılışı keçirilib. “Uşaqlıq şənlikdir” şüarı altında TÜYAP kompleksində təşkil olunan sərgi bu il ölkəmiz üçün xüsusilə əlamətdardır. Mədəniyyət Nazirliyinin təşkilatçılığı ilə Azərbaycan ilk dəfə sərgidə “fəxri qonaq ölkə” qismində iştirak edir.
Sərginin açılışında İstanbul valisi Davud Gül, İstanbul Böyükşəhər Bələdiyyəsinin başqanı Ekrem İmamoğlu, TÜRKSOY-un baş katibi Sultan Raev, Azərbaycan Respublikası mədəniyyət nazirinin müavini Fərid Cəfərov, Milli Məclisin Mədəniyyət komitəsinin sədr müavini Günay Əfəndiyeva, Türkiyə Mədəniyyət və Turizm Nazirliyi Kitabxanalar və Nəşriyyatlar Baş İdarəsinin rəhbəri Taner Bəyoğlu, Türkiyə Yayınçılar Birliyinin sədri Kenan Kocatürk, Azərbaycan Yazıçılar Birliyi sədrinin birinci müavini Xalq yazıçısı Çingiz Abdullayev, Xalq yazıçısı Elçin, eləcə də ölkəmizdən və Türkiyədən tanınmış və gənc yazarlar iştirak ediblər.
TÜYAP Sərgi Kompleksinin rəhbərliyindən İlhan Ersözlü çıxış edərək 41-ci İstanbul sərgisi münasibətilə təbriklərini çatdırıb, sərgi haqqında məlumat verib.
Bildirilib ki, 9 gün davam edəcək sərgidə Türkiyədən və xaricdən 2000-dən çox yazıçı və şair iştirak edir. Sərgi çərçivəsində 200-dən çox imza mərasimi daxil olmaqla, 450-dək müxtəlif səpkili tədbir təşkil olunacaq.
Azərbaycan mədəniyyət nazirinin müavini Fərid Cəfərov çıxış edərək tədbir iştirakçılarını salamlayıb, belə bir nüfuzlu sərginin "fəxri qonaq ölkə"si olmaqdan məmnunluq duyduqlarını diqqətə çatdırıb.
Bildirilib ki, Azərbaycanın Ümummilli lideri Heydər Əliyevin "Bir millət, iki dövlət" kimi səciyyələndirdiyi Azərbaycan və Türkiyə eyni etnik-mədəni köklərə malik olmaqla zəngin ortaq dəyərləri paylaşmaqdadır. Tarixdən gələn bu yaxınlığın möhkəmlənməsində, xalqlarımızın qədim və zəngin mədəniyyəti və ədəbiyyatı əsas rol oynayıb.
Qeyd olunub ki, türk ədəbiyyatının böyük simaları Rəşad Nuri Güntəkin, Yaşar Kamal, Nazim Hikmət, Əziz Nesin kimi yazarların əsərləri Azərbaycanda böyük rəğbətlə qarşılanıb, dəfələrlə nəşr edilib: "Bu gün də ölkəmizdə türk ədəbiyyatının tanınmış simalarının əsərlərinin tərcüməsi və təbliği işi davam etdirilir. Eyni zamanda məşhur Azərbaycan yazarları Hüseyn Cavid, Əhməd Cavad, Yusif Vəzir Çəmənzəminli, Almas İldırım, Əhməd Ağaoğlu, Bəxtiyar Vahabzadə və başqalarının əsərlərinin Türkiyə oxucuları tərəfindən sevilməsi bizləri fərəhləndirir. Əhməd Cavadın qələmə aldığı, dahi Azərbaycan bəstəkarı Üzeyir Hacıbəylinin musiqi yazdığı və Qafqaz İslam Ordusunun marşı kimi səslənən "Çırpınırdın, Qara dəniz" şeiri xalqlarımızın dilinin əzbəridir".
Nazir müavini bildirib ki, bu gün Azərbaycan-Türkiyə münasibətləri tarixinin qızıl dövrünü yaşayır. Bunun da əsasında, ilk növbədə, dövlət başçılarımız – Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın şəxsi dostluğu dayanır. Dövlətlərimizin müttəfiqlik münasibətləri mədəni əlaqələrin də inkişafına münbit şərait yaradır. Ölkələrimiz həm ikitərəfli, həm də beynəlxalq təşkilatlar çərçivəsində uğurla əməkdaşlıq edir.
Fərid Cəfərov çıxışının sonunda sərginin təşkilində zəhməti olanlara və Azərbaycan nümayəndə heyətinə göstərilən yüksək qonaqpərvərliyə görə təşəkkürünü bildirib, sərginin işinə uğurlar arzulayıb.
İstanbul Böyükşəhər Bələdiyyəsinin başqanı Ekrem İmamoğlu, Türkiyə Mədəniyyət və Turizm Nazirliyi Kitabxanalar və Nəşriyyatlar Baş İdarəsinin rəhbəri Taner Beyoğlu, Türkiyə Yayınçılar Birliyinin sədri Kenan Kocatürk, İstanbul valisi Davud Gül, sərginin "fəxri yazarı" Yalvaç Ural və başqaları çıxış edərək sərginin əhəmiyyətini vurğulayıblar. Çıxışlarda Türkiyədə kitab sənayesinin mövcud vəziyyəti və qarşıda duran vəzifələrdən də söz açılıb.
İstanbul valisi Davud Gül mədəniyyət nazirinin müavini Fərid Cəfərova valiliyin hədiyyə plaketini təqdim edib.
Sonra sərginin rəmzi açılışını bildirən lent kəsilib.
Sərgi məkanında nağaraçalan uşaqlar qrupunun ifasında kompozisiya təqdim olunub.
Daha sonra tədbir iştirakçıları sərgi məkanında Azərbaycan stendinin açılışında iştirak ediblər.
Əvvəlcə incəsənət ustalarımızın iştirakı ilə bədii proqram təqdim olunub.
Yeniyetmə xanəndə Həzrət Əzizlinin ifasında "Bayatı-Şiraz" muğamı səsləndirilib. Bu il dövlət başçısının sərəncamı ilə 530 illiyi qeyd olunan dahi Azərbaycan şairi Məhəmməd Füzulinin "Leyli və Məcnun" əsəri əsasında Üzeyir Hacıbəylinin yazdığı eyniadlı operadan rəqs kompozisiyası təqdim olunub.
Əməkdar artist Nuriyyə Hüseynova "Yaşa, Azərbaycan" mahnısını ifa edib. Xanəndəni Xalq artisti Elçin Həşimov (tar), Əməkdar artist Elnur Əhmədov (kamança) və Siyavuş Kərimov (nağara) müşayiət ediblər.
Daha sonra Azərbaycan stendi ilə tanışlıq olub.
Məlumat verilib ki, stenddə ölkəmizdən 20-dən çox nəşriyyatın kitabları, ümumilikdə 2 mindən çox nəşr nümunəsi yer alıb.
Stenddə Azərbaycanın dövlətçilik tarixi, Heydər Əliyev Fondunun ədəbiyyat və mədəniyyətimizlə bağlı nəşrləri, bədii ədəbiyyat nümunələri təqdim edilir. Burada tanınmış və gənc yazarlarımızın Türkiyədə türk dilində nəşr olunmuş əsərləri də sərgilənir.
Türk Mədəniyyəti və İrsi Fondunun nəşrlərinə Azərbaycan stendində ayrıca guşə ayrılıb.
Stenddə milli şirniyyatlarımızın da təqdimatı olub.
Bildirək ki, noyabrın 10-dək davam edəcək sərgi çərçivəsində milli stendimizdə 20-dən çox müxtəlif səpkili tədbirin təşkili nəzərdə tutulub.