Azərbaycan Universitetində dahi Azərbaycan şairi və mütəfəkkiri Məhəmməd Füzulinin anadan olmasının 530 illiyinə həsr olunmuş ədəbi-bədii tədbir keçirilib.

Universitetdən TƏHSİL.BİZ -ə bildirilib ki, “Məhəmməd Füzuli-530” adlı tədbirdə böyük şairin nadir sənət nümunəsi olan zəngin irsinə nəzər salınıb, tələbələrin ifasında yaradıcılığından poetik nümunələr təqdim olunub.

Ədəbi-bədii tədbirdə Məhəmməd Füzulinin həm ritmik qəzəlləri, həm də dövrün ictimai-siyasi hadisələrinə münasibətini bildirdiyi, dərin mənalı əsərlərindən parçalar oxunub. Ədəbi-bədii kompozisiya Füzulinin qəzəllərinə bəstələnmiş romans və musiqi əsərləri ilə müşayiət edilib.

Sonda tədbirdə iştirak edən müəllimlər – Tərcümə və filologiya kafedrasının müdiri Gülnar Rzayeva, kafedranın müəllimləri Hüseyn Hüseynli, Ülviyyə Əliyeva Məhəmməd Füzulinin Azərbaycan ədəbi fikrinin inkişafında müstəsna yerini və əhəmiyyətini vurğulayıblar.

Qeyd edək ki, tələbələr ədəbi-bədii tədbirə Tərcümə və filologiya kafedrasının müəllimi Solmaz Süleymanovanın rəhbərliyində hazırlaşıblar. Tədbir Azərbaycan Respublikası Prezidentinin “Dahi Azərbaycan şairi Məhəmməd Füzulinin 530 illiyinin qeyd edilməsi haqqında” 2024-cü il 25 yanvar tarixli Sərəncamından irəli gələn vəzifələrin icrası çərçivəsində təşkil olunub.