Azərbaycan Dövlət İqtisad Universiteti (UNEC) nəzdində Maliyyə-İqtisad Kollecinin 90 illik yubileyi qeyd olunub.

Bu barədə TƏHSİL.BİZ-ə universitetdən məlumat verilib.

Yubiley tədbirindən öncə iştirakçılar Fəxri xiyabanda Ulu Öndər Heydər Əliyevin məzarını ziyarət edərək abidəsi önünə güllər düzüblər, Ümummilli Liderin əziz xatirəsini ehtiramla yad ediblər.

Təntənəli yubiley tədbirində kollec tələbələrinin əl işlərindən ibarət rəsm əsərləri nümayiş olunub və təhsil müəssisəsinin 90 illiyinə həsr edilmiş konfrans materialları sərgilənib.

Tədbirin açılışında çıxış edən UNEC-in rektoru professor Ədalət Muradov Maliyyə-İqtisad Kollecinin Azərbaycanda orta ixtisas təhsili verən ilk kollec olduğunu diqqətə çatdırıb. Professor Ədalət Muradov Ermənistanın işğalına qədər kollecin Xocalıda filialının fəaliyyət göstərdiyini deyib. UNEC nəzdində Maliyyə-İqtisad Kollecinin prioritetlərindən birinin qısa vaxtda Xocalıda filialının fəaliyyətinin bərpası olduğunu vurğulayıb. Rektor Azərbaycanda kollec təhsilinin təkmilləşdirilməsi ilə bağlı təkliflər də səsləndirib.

Sonra Milli Məclisin Elm və təhsil komitəsinin sədri professor Anar İsgəndərov, Müdafiə, təhlükəsizlik və korrupsiya ilə mübarizə komitəsinin sədri Arzu Nağlyev, Elm və Ali Təhsil üzrə Dövlət Agentliyinin direktor müavini professor Əminağa Sadıqov kollecin kollektivini təbrik ediblər.

Tədbirdə kollecin Vətən müharibəsində şəhid olmuş məzunları Murad Qurbanov, Miqdad Abduləlimov, Elşən İbrahimovun rəsmləri onların valideynlərinə təqdim olunub.

Yubiley tədbiri tələbələrin ifasında musiqi proqramı ilə davam edib.