Qarabağ Universitetinin rektoru Şahin Bayramov ali təhsil müəssisəsinin yaradılmasının 1 illiyi münasibətilə universitetin professor-müəllim, inzibati heyət üzvləri və tələbələri ilə görüş keçirib. 

TƏHSİL.BİZ xəbər verir ki, görüş zamanı rektor universitetin fəaliyyətinə dair əhəmiyyətli məqamlara toxunub və bir illik fəaliyyəti ümumiləşdirərək gələcək inkişaf istiqamətləri barədə hədəfləri diqqətə çatdırıb. 

Ş.Bayramov çıxışında qeyd edib ki, Qarabağ Universiteti regionun intellektual və mədəni mərkəzinə çevrilməyi qarşısına məqsəd qoyub. Rektor, həmçinin universitetdə təhsil keyfiyyətinin artırılması, yeni layihələrin reallaşdırılması və tələbələrin elmi fəaliyyətə cəlb olunması istiqamətində görülən işlərdən bəhs edib. 

Daha sonra universitetin əməkdaşları və tələbələr çıxış edərək Qarabağ Universitetinin ilk tədris ili ərzində əldə etdiyi nailiyyətlərdən danışıblar. Çıxışlarda universitetin qısa müddətdə yüksək nüfuz qazandığı və bölgənin təhsil həyatına mühüm töhfələr verdiyi vurğulanıb. 

Qeyd edək ki, Qarabağ Universiteti 28 noyabr 2023-cü il tarixində Prezident İlham Əliyevin müvafiq Sərəncamı ilə yaradılıb.