Azərbaycanda müəllimlərin sosial statusunun artırılması və onların daha yaxşı iş şəraiti ilə təmin olunması təhsil sisteminin əsas prioritetlərindən biri olmalıdır. Təhsil eksperti Kamran Əsədov qeyd edir ki, müəllimlər yalnız cəmiyyətin gələcəyini formalaşdıran əsas təməllərdən biri deyil, həm də digər peşə sahiblərinin yetişdirilməsində həlledici rol oynayır. "Əgər biz təhsildə davamlı inkişaf istəyiriksə, müəllimləri hər cəhətdən dəstəkləməli, onların həyat şəraitini kökündən dəyişməliyik," deyə o vurğulayır.

Hazırda Azərbaycanda müəllimlərin maaşı dövlət sektorunda çalışan digər peşə sahibləri ilə müqayisədə yüksək deyil. Kamran Əsədov bildirir ki, müəllimlərin əməkhaqqı dövlət qulluqçularına bərabər olmalı və hətta bəzi hallarda onları üstələməlidir. "Müəllimlər öz maddi problemləri haqqında düşünməməli, yalnız tədris prosesinə fokuslanmalıdırlar," deyə o əlavə edir.

Müqayisə üçün qeyd etmək lazımdır ki, inkişaf etmiş ölkələrdə müəllimlərin maaşı yüksək səviyyədədir. Məsələn, Finlandiyada müəllimlər illik 40-50 min avro qazanır və bu, ölkədəki orta əməkhaqqı göstəricilərindən xeyli yüksəkdir. Kamran Əsədov qeyd edir ki, Azərbaycanda da müəllimlərin maaşı ən azı ölkə üzrə orta əməkhaqqı səviyyəsindən iki dəfə yüksək olmalıdır. Bu, həm müəllim peşəsinə marağı artırar, həm də təhsildə keyfiyyəti təmin edər.

Ekspert təklif edir ki, müəllimlər bütün kommunal ödənişlərdən, o cümlədən işıq, qaz, su və yol xərclərindən azad edilməlidir. "Müəllimlər cəmiyyət üçün çoxşaxəli xidmət göstərir. Onların bu xərclərdən azad edilməsi həm maddi, həm də mənəvi dəstək rolunu oynayar," deyə Kamran Əsədov qeyd edir. Bundan əlavə, müəllimlər üçün xüsusi nəqliyyat vasitələrinin təşkil olunması və ya onların nəqliyyat xərclərinin tam ödənilməsi də vacib addımlardan biridir.

Müəllimlərin iş yükü məsələsinə toxunan Kamran Əsədov bildirir ki, onların iş günləri qısaldılmalı, istirahət günləri artırılmalıdır. Hazırda Azərbaycanın təhsil sistemində müəllimlərin həftəlik iş yükü bəzi hallarda həddindən artıq çoxdur. Ekspertin fikrincə, daha səmərəli iş rejimi müəllimlərin məhsuldarlığını artırar və tədris keyfiyyətini yüksəldər.

Kamran Əsədov sonda vurğulayır ki, müəllimlər dövlət qulluqçuları üçün mövcud olan bütün imtiyazlardan yararlanmalıdır. Bu, yalnız onların maddi və sosial vəziyyətini yaxşılaşdırmaqla qalmır, həm də cəmiyyətin gözündə müəllim nüfuzunu artırır. "Müəllimlər gələcəyin memarlarıdır. Biz onlara yüksək qayğı göstərməliyik ki, gələcəyimiz etibarlı əllərdə olsun," deyə ekspert fikirlərini yekunlaşdırır.

Statistika göstərir ki, Azərbaycanda müəllimlərin maaşı son illərdə artsa da, onların sosial rifahını tam təmin etmək üçün əlavə tədbirlərə ehtiyac var. Təhsil ekspertlərinin fikrincə, bu sahədə islahatlar daha geniş miqyaslı və məqsədyönlü olmalıdır. "Müəllim peşəsi ölkədə ən hörmətli və ən yüksək təminatlı sahələrdən biri olmalıdır," deyə Kamran Əsədov fikirlərini yekunlaşdırır.

Bəhman Hüseynli