Tədbir başlamazdan əvvəl Ulu Öndər Heydər Əliyevin və Azərbaycan Respublikasının ərazi bütövlüyü və suverenliyi uğrunda canlarından keçən şəhidlərin əziz xatirəsi yad olunub.

Sonra Azərbaycan Respublikasının Dövlət Himni səsləndirilib.

Naxçıvan Dövlət Universitetinin Həmkarlar İttifaqı Komitəsinin sədri Nicat Yaqubov çıxışında Ulu Öndər Heydər Əliyevin Azərbaycan xalqının taleyində oynadığı mühüm roldan, onun vətənimiz üçün göstərdiyi tarixi xidmətlərdən bəhs edib. O vurğulayıb ki, Heydər Əliyevin müdrik rəhbərliyi dövründə Azərbaycanın beynəlxalq aləmdə mövqeyi möhkəmlənib, daxili sabitlik bərqərar olub və hərtərəfli inkişafın əsası qoyulub. Bildirilib ki, Ümummilli Liderin hər iki hakimiyyət dövründə həyata keçirdiyi dərin islahatlar və strateji addımlar nəticəsində ölkəmizin müstəqilliyi əbədi və sarsılmaz olub. Nicat Yaqubov eyni zamanda, Heydər Əliyevin gənclərə göstərdiyi xüsusi diqqət və qayğını da vurğulayıb. O qeyd edib ki, Ümummilli Liderin həyata keçirdiyi təhsil islahatları, gənclərin dünyəvi biliklərə yiyələnməsi və beynəlxalq təcrübə qazanması üçün yaratdığı imkanlar bu gün ölkəmizin intellektual inkişafına böyük töhfə verib. Diqqətə çatdırılıb ki, Heydər Əliyevin gənclərə verdiyi dəyər, onların cəmiyyətin aparıcı qüvvəsinə çevrilməsi istiqamətindəki fəaliyyətləri Azərbaycanın uğurlu gələcəyinin təminatına çevrilib.

Naxçıvan Dövlət Universitetinin “Azərbaycan tarixi” kafedrasının baş müəllimi Zamin Əliyev çıxış edərək, Heydər Əliyevin Azərbaycan tarixindəki müstəsna rolunu vurğulayıb. O qeyd edib ki, Ümummilli Liderin dərin zəkası, strateji baxışı və xalqına olan sonsuz sevgisi sayəsində Azərbaycan çətin dövrlərdən keçərək güclü dövlətə çevrilib. Zamin Əliyev Heydər Əliyevin ölkəmizin müstəqilliyinin möhkəmləndirilməsi və beynəlxalq arenada tanıdılması istiqamətində gördüyü işləri xüsusi diqqətə çatdırıb. O əlavə edib ki, bu gün Heydər Əliyev irsinin öyrənilməsi və gənc nəsillərə çatdırılması hər birimizin əsas vəzifəsidir.

Sonda Ümummilli Lider Heydər Əliyevin həyat və fəaliyyətini əks etdirən videoçarx nümayiş olunub.