Mərkəzi Aran Regional Mədəniyyət İdarəsi tərəfindən “Yaşıl dünya naminə həmrəylik ili” münasibətilə keçirilən “Mənim yaşıl dünyam” adlı rəsm müsabiqəsinə yekun vurulub.

Dekabrın 24-də müsabiqə qaliblərinin mükafatlandırma mərasimi keçirilib.

Ağdaş rayon Heydər Əliyev Mərkəzində gerçəkləşən tədbirdə qonaqlar ilk olaraq final mərhələsində iştirak etmək haqqı qazanan namizədlərin rəsmlərindən ibarət sərgi ilə tanış olublar.

Daha sonra regional idarənin tabeliyində fəaliyyət göstərən uşaq musiqi, incəsənət məktəbləri müəllimlərinin, şagirdlərdən ibarət xor kollektivinin və rəqs ansamblının, eləcə də mədəniyyət mərkəzləri əməkdaşlarının iştirakı ilə konsert proqramı təqdim edilib.

Sonda qaliblərin mükafatlandırma mərasimi olub. Münsiflər heyətinin qərarına əsasən, final mərhələsində iştirak edən namizədlər hər yaş qrupu üzrə müvafiq olaraq I, II və III dərəcəli diplomlar və hədiyyələrlə təltif olunublar.

Qeyd edək ki, “Yaşıl dünya naminə həmrəylik ili”nə həsr edilmiş müsabiqənin məqsədi xüsusi bacarığa malik olan uşaqların yaradıcılıq qabiliyyətlərinin inkişaf etdirilməsi, məktəbdənkənar vaxtlarının səmərəli keçirilməsi, bədii-estetik zövqünün tərbiyə edilməsi, yeni istedadların üzə çıxarılması olub. Müsabiqədə regional idarənin xidməti əhatəsinə aid olan Mingəçevir şəhəri, Ağdaş, Göyçay, Kürdəmir, Ucar, Yevlax və Zərdab rayonlarından olan 6-17 yaş arası namizədlər 3 yaş qrupunda (6-9 yaş, 10-13 yaş, 14-17 yaş) iştirak ediblər.