Milli Kitabxanada xalqımıza Qarabağ Zəfərini bəxş edən, bizi qalib xalqa çevirən, Silahlı Qüvvələrin Ali Baş Komandanı, Prezidenti İlham Əliyevin doğum günü münasibətilə virtual sərgi və ənənəvi kitab sərgisi istifadəçilərə təqdim olunub.

Kitabxananın əməkdaşları tərəfindən hazırlanan “Müzəffər Ali Baş Komandan İlham Əliyev” adlı virtual sərgidə dövlət başçısının uzaqgörən siyasəti, uğurlu sosial-iqtisadi inkişaf strategiyası, yüksək diplomatik məharəti, qətiyyəti, qurub-yaratmaq bacarığı, cəmiyyət həyatının bütün sahələrində qazanılmış mühüm nailiyyətlər, 44 günlük qəhrəmanlıq savaşımız və s. haqqında Azərbaycan və müxtəlif dillərdə ədəbiyyatlar, dövri mətbuatda dərc olunan məqalələr nümayiş olunur.

Virtual sərgi ilə tanış olmaq istəyənlər https://anl.az/el/vsb/Ilham_Eliyev/index.htm linkindən istifadə edə bilərlər.

Ənənəvi sərgidə isə Ulu öndər Heydər Əliyevin siyasi kursunun layiqli davamçısı Prezident İlham Əliyevin həyatı, onun rəhbərliyi altında ölkəmizdə həyata keçirilən uğurlu daxili islahatlar və məqsədyönlü xarici siyasəti, müstəqil Azərbaycanda aparılan davamlı inkişaf strategiyası, 44 günlük Vətən müharibəsi və şanlı Qələbə və s. haqqında Azərbaycan və başqa dillərdə ədəbiyyatlar yer alıb.