SOCAR-ın Bakı Ali Neft Məktəbində (BANM) “Hult Prize On Campus” mərhələsi keçirilib.

BANM-dən TƏHSİL.BİZ -ə bildirilib ki, yarışma BMT-nin Dayanıqlı İnkişaf Məqsədlərinə (SDG) uyğun olaraq, müəyyən edilmiş konkret sosial problemə həsr olunub.

Bir sıra qurumlardan olan şəxslər münsif qismində iştirak ediblər.

Tədbirdən əvvəl rektor Elmar Qasımov qonaqlarla görüşüb. Görüşdə innovasiya sahəsində tələbələrin uğurları və aktivliyi və bu istiqamətdə gələcəkdə hədəflər barədə söhbət aparılıb.

Tədbiri açıq elan edən rektor Elmar Qasımov iştirakçılara uğurlar arzulayıb və tələbələrin sahibkarlıq sahəsində beynəlxalq arenada parlaması üçün belə platformaların əhəmiyyətini vurğulayıb.

Yarışmada ali məktəbin 10 aktiv startap komandası iştirak edib. Hər il olduğu kimi, bu il də tələbələr qlobal əhəmiyyətli problemlərin həlli istiqamətində innovativ ideyalarıni təqdim edərək mübarizə aparıblar.

Ötən il Bakı Ali Neft Məktəbinin “Agroficient” komandası Lissabonda keçirilmiş regional mərhələnin qalibi olaraq qlobal akselerasiya proqramında iştirak etmək hüququ qazanmışdı.