Məktəbəqədər və Ümumi Təhsil üzrə Dövlət Agentliyi tərəfindən eksternat qaydada təhsil sənədi almaq üçün aralıq imtahanları keçirilib.

Şirvan-Salyan Regional Təhsil İdarəsindən TƏHSİL.BİZ -ə verilən məlumata görə, imtahanda əvvəlki illərdə ümumtəhsil məktəblərində oxuyub ümumi və ya tam orta təhsil səviyyəsini bitirə bilməyən şəxslər iştirak edib.

Salyan şəhər Nizami Gəncəvi adına 2 nömrəli tam orta ümumtəhsil məktəbində təşkil olunan imtahana 496 nəfər qatılıb. Onlardan 362 nəfər tam orta, 134 nəfəri isə ümumi orta təhsil haqqında attestat almaq üçün imtahanda iştirak edib. Eksternlər hərəsində 10 sual olmaqla 11 fənn (Ana dili, ədəbiyyat, kimya, fizika, riyaziyyat, informatika, Azərbaycan tarixi, ümumi tarix, biologiya, coğrafiya və xarici dil) üzrə imtahan veriblər.

Eksternat imtahanlarında uğur qazanmış şəxslər ümumi və ya tam orta təhsil haqqında sənəd (attestat) almaq üçün Dövlət İmtahan Mərkəzi tərəfindən keçirilən buraxılış imtahanlarında iştirak etmək hüququna sahib olacaqlar.

Qeyd edək ki, sərbəst (eksternat) təhsilalma formasının tətbiqi müxtəlif səbəblərdən tam orta təhsil səviyyəsini başa vura bilməyən şəxslərə həmin səviyyə üzrə buraxılış imtahanı verib müvafiq təhsil sənədi almaq üçün şərait yaratmaq məqsədi daşıyır.