Təhsil eksperti Kamran Əsədov vurğulayır ki, 2025-ci il Azərbaycan təhsili üçün yeni hədəflər və çağırışlarla başlayır. Müasir dövrün tələblərinə cavab verən təhsil sistemi qurmaq üçün prioritet istiqamətlərin dəqiqləşdirilməsi, müəllimlərin dəstəklənməsi və təhsilin keyfiyyətinin artırılması mühüm əhəmiyyət kəsb edir. “Yeni ildə təhsil ictimaiyyəti olaraq əsas məqsədimiz hər bir şagirdin bilik və bacarıqlarını maksimum dərəcədə inkişaf etdirmək üçün şərait yaratmaqdır,” – deyə Kamran Əsədov qeyd edir.
Ekspert bildirir ki, təhsil sahəsində ən böyük gözləntilərdən biri rəqəmsallaşma prosesinin sürətlənməsidir. 2024-cü ilin statistikasına görə, Azərbaycan məktəblərinin yalnız 60%-i tamamilə rəqəmsal tədris avadanlıqları ilə təchiz edilib. Bu rəqəm dünya göstəricilərindən geri qalır. Kamran Əsədov sitat gətirir ki, “Dünya Bankının son hesabatına əsasən, Avropa ölkələrində orta məktəblərin 85%-i rəqəmsal platformalara çıxış imkanına malikdir. Biz də bu səviyyəyə çatmaq üçün ciddi addımlar atmalıyıq.”
2025-ci ildə müəllimlərə olan diqqətin daha da artırılması vacibdir. Kamran Əsədov bildirir ki, “Azərbaycan təhsili üçün müəllimlər cəmiyyətin əsas sütunudur. Müəllimlərin maaşlarının artırılması, peşəkar inkişaf proqramlarının genişləndirilməsi və onların sosial rifahının təmin olunması prioritetlərdən biri olmalıdır.” Hazırda ölkədə orta aylıq müəllim maaşı 500-600 manat təşkil edir. Ekspertin fikrincə, bu rəqəm müasir iqtisadi reallıqlara uyğunlaşdırılmalı və 2025-ci ildə minimum 800 manata çatdırılmalıdır.
Təhsil eksperti həmçinin vurğulayır ki, 2025-ci ildə təhsil sistemində daha çox yenilik gözlənilir. “Beynəlxalq təcrübədən öyrənməliyik. Məsələn, Finlandiya və Estoniya kimi ölkələrdə şagirdlərə fərdi yanaşma prioritetdir. Azərbaycanda da şagirdlərin maraq və qabiliyyətlərini nəzərə alan təhsil modelləri tətbiq olunmalıdır,” – deyə Kamran Əsədov qeyd edir.
Ekspert bildirir ki, yeni ildə inklüziv təhsilin inkişafına xüsusi diqqət yetirilməlidir. “2024-cü ildə inklüziv təhsilə cəlb olunan şagirdlərin sayı ümumi şagirdlərin yalnız 3%-ni təşkil edib. Bu rəqəm artırılmalı və xüsusi ehtiyaclı şagirdlər üçün daha çox resurs ayrılmalıdır,” – deyə Kamran Əsədov vurğulayır. O əlavə edir ki, inkişaf etmiş ölkələrdə bu göstərici 10%-dən çoxdur.
2025-ci ildə təhsil ictimaiyyəti üçün digər bir önəmli məsələ gənclərin xaricdə təhsil alması və Azərbaycana geri qayıtmasıdır. Kamran Əsədov qeyd edir ki, “2024-cü ildə təxminən 12 min azərbaycanlı tələbə xaricdə təhsil alıb, lakin onların yalnız 30%-i təhsilini başa vurduqdan sonra ölkəyə geri dönüb. Yeni ildə xaricdə təhsil alan gənclərin geri dönüşünü təşviq etmək üçün daha əlverişli şərait yaradılmalıdır.”
Təhsil eksperti 2025-ci ildə valideynlərin də üzərinə böyük məsuliyyət düşdüyünü qeyd edir. “Təhsil təkcə məktəbin deyil, ailənin də işidir. Valideynlər uşaqlarının təhsili ilə daha yaxından maraqlanmalı, onları yalnız nəticə əldə etməyə deyil, öyrənmə prosesindən zövq almağa təşviq etməlidirlər,” – deyə Kamran Əsədov bildirir.
Yeni il ərəfəsində Kamran Əsədov Azərbaycan təhsil ictimaiyyətinə və müəllimlərə dərin minnətdarlığını ifadə edir. O bildirir ki, “Azərbaycan müəllimi hər zaman öz fədakarlığı ilə fərqlənib. 2025-ci ildə müəllimlərin zəhməti daha çox qiymətləndirilməli, onların səsi daha çox eşidilməlidir. Hər bir müəllim cəmiyyətin intellektual kapitalının formalaşmasında əsas rol oynayır.”
Ekspert sonda vurğulayır ki, 2025-ci ildə təhsil sahəsində həyata keçiriləcək islahatlar yalnız cəmiyyətin birgə səyləri ilə mümkün olacaq. “Azərbaycan təhsili irəliləmək üçün güclü potensiala malikdir. Əsas olan bu potensialdan düzgün istifadə etməkdir,” – deyə Kamran Əsədov fikrini yekunlaşdırır.