Azərbaycanlı bəstəkar, Bakı Musiqi Akademiyası və Estoniya Musiqi və Teatr Akademiyasının məzunu, hazırda bəstəkar kimi fəaliyyətini kino və teatr sahəsində davam etdirən, Respublika və Beynəlxalq müsabiqələr laureatı Nigar Süleyman Polşada keçirilən beynəlxalq “WBM” müsabiqəsində 1-ci yerə layiq görülüb.

Tehsil.biz xəbər verir ki, o, İkinci Qarabağ müharibəsində şəhid olmuş, Hadrut uğrunda döyüşən XTQ giziri şəhid Rəşad Babayevə həsr etdiyi və elə İkinci Qarabağ müharibəsi ərəfəsində yazdığı “Simli kvartet” əsəri ilə final mərhələsinə keçərək 22 bəstəkar arasında 1-ci yeri tutub. Qaliblər sırasında Amerika, Yaponiya, Çindən bəstəkarlar da var.

Əsərdə qəhrəmanın ürək döyüntüləri, mübarizəsi və ölümü əks olunub.

Qeyd edək ki, Nigar Süleyman 13 yaşından bəstəkarlıqla məşğul olur, Bülbül adına məktəbdə ilk bəstəkarlıq təhsilini Pikə Axundovadan, daha sonra Ceyhun Allahverdiyevdən alıb. Bununla yanaşı Estoniyada təhsil aldığı müddətdə Malle Maltis, Tammo Sumera, Liisa Hirsch kimi bəstəkarlardan tələbəsi olub.