Azərbaycan Universitetində əcnəbi vətəndaşlar üçün Azərbaycan dilində hazırlıq (foundation) kursuna start verilib. Kursun əsas vəzifəsi xarici ölkə vətəndaşlarını Azərbaycan Universitetində, həmçinin ölkədə fəaliyyət göstərən digər ali təhsil müəssisələrində bakalavriat və magistratura səviyyələrində təhsil almaları üçün hazırlamaqdır. Kurs əcnəbi vətəndaşlara Azərbaycan dilini öyrənmək yaxud təkmilləşdirməklə yerli mühitə daha sürətli uyğunlaşmaq və təhsildə uğur qazanmaq imkanı yaradır.

Bu barədə universitetdən TƏHSİL.BİZ -ə məlumat verilib. Bildirilib ki, hazırlıq kursunda təhsil müddəti 1 tədris ilidir. Tədris peşəkar müəllimlər tərəfindən aparılır və müasir metodikaya əsaslanır. İştirakçılara Azərbaycan dili bilikləri ilə yanaşı baza fənləri də tədris olunur. 

Hazırlıq kursunu uğurla başa vuran iştirakçılara Elm və Təhsil Nazirliyinin müvafiq şəhadətnaməsi təqdim olunacaq. Şəhadətnamə əcnəbi vətəndaşlara Azərbaycan Universitetində, o cümlədən ölkənin digər ali təhsil müəssisələrində təhsillərini davam etdirmək hüququ verir.